|
|
 |
| 首頁 Home | 電影 Films | 評論 Opinions | 戲院 Cinemas | 資訊 Information | 網站地圖 Site Map |
首頁 ->
電影 -> 香港每年上映電影
->
Home -> Films ->
Films Released in Hong Kong by Year ->
| 開畫日期 Release Date | ||
| 片長（分鐘） Running Time (Min.) | ||
| 級別 Category | ||
| 上映戲院（首週） Cinema Line-Up (First Week) |
詹瑞文係好狗先生？！
詹瑞文好聲好戲 笑聲攻陷銀幕
今個復活節 爆笑開Show！
今個復活節，形體棟篤笑大師、憑連場爆滿舞台劇《男人之虎》成為麻甩佬代言人嘅詹瑞文，又一瘋狂突破大搞作，撲身大銀幕聲演「好狗先生」，一時係人，一時扮狗，淨係靠把聲玩到出神入化，加上自度對白爆肚加料，保證篤到你笑口不絕！
以獨門幽默抵死的演繹方式，以及豐富形體動作見稱的詹瑞文，代表作《男人之虎》連場爆滿，成為香港首個長壽獨腳戲，打破香港棟篤笑舞台劇紀錄，可見其受歡迎程度！在電影中的演出，如《大丈夫》、《絕世好B》、《龍咁威》、《春田花花同學會》等，同樣搶晒鏡！「叉燒包」二手煙廣告亦令人留下深刻印象。
今次主打聲演《好狗先生》，詹瑞文視為另一高難度挑戰，皆因他雖然曾在《男人之虎》中，一人分飾三十幾個角色，包括抹窗大佬、Ball場情人、東江遊擊隊阿伯、影視名人等，但演藝生涯中始終未試過人變狗、狗變人，何況今次只係得把聲，如何將他最擅長的幽默抵死形體動作，透過聲音表達，大家真係要拭目以待！
你有幾狗？ 大測試
1. 你放假最鍾意嘅活動係：
A. 去街（→ 題2）
B. 由朝食到晚（→ 題3）
C. 執拾屋企（→ 題4）
2. 你去廁所嘅習慣通常係：
A. 邊度都去得（→ 題3）
B. 最好搵間乾淨嘅廁所（→ 題3）
C. 忍到返屋企，一定要私家廁至去得舒暢（→ 題5）
3. 你食飯嘅習慣通常係：
A. 狼吞虎嚥，冇乜要求，15分鐘之內搞掂一餐飯（→ 題4）
B. 電視送飯，睇邊齣劇緊要過食乜（→ 題5）
C. 揀飲擇食，注重氣氛，最好開支紅酒慢慢嘆 （→ 題6）
4. 見到靚仔／靚女，你第一眼望嘅部位通常係：
A. 眼睛（→ 題6）
B. 臀部（→ 題5）
C. 頭髮（→ 題5）
5. 見到老友／老婆，你會點樣打招呼？
A. 熊抱對方（→ 題6）
B. 唔使見面，互傳SMS就夠（→ 題7）
C. 伸長脷舔人塊面（→ 題6）
6. 你與同事開會，通常都係：
A. 吹水唔抹咀（→ 題8）
B. 瞓到流晒口水（→ 題7）
C. 扮有其他會開，唔去開會（→ 題7）
7. 如果有人因小事得罪你，你會：
A. 聲大夾惡，咬住唔放，直至對方道歉為止（→ 題8）
B. 表面扮無事，暗地裡周圍唱衰佢（→ 題9）
C. 由佢啦，橫掂成日都俾人蝦（→ 題9）
8. 你最討厭嘅動物係：
A. 貓（→ 題9）
B. 狗（→ 題10）
C. 人（→ 題10）
9. 你覺得自己係一個咩人？
A. 一個好人（→ A型）
B. 其實唔多想做人（→ C型）
C. 我都唔知（→ 題10）
10. 如果你係一隻狗，你覺得自己會係邊種狗？
A. 烚熟狗頭、見人就吠嘅大隻狗（→ A型）
B. 好Cutie、好得人鍾意嘅細狗仔（→ B型）
C. 橫掂都係狗，邊種狗都冇乜所謂（→ C型）
好狗分析
A型
嘩！你比一隻狗更「狗」，完全係一位「好狗先生／小姐」！
唔該你即刻同下面果位同類相認！
B型
你份人都幾「狗」喎！差少少就會變成下面果位「好狗先生」，唔信你自己睇下！
C型
你完全唔「狗」，係一個好正常嘅普通人。
但咁樣做人有咩樂趣，不如參考下面果位「好狗先生」，學下點樣可以「狗」啲、開心啲！
明明係男人 點會狗成咁！
戴偉德係一個工作狂律師，將大好家庭掟埋一邊，終日沉迷工作，由朝到晚做到隻狗咁。
點知有一日，失驚無神走隻大笨狗入屋，仲無端端咬咗佢一啖，被咬律師自此以後有時係隻狗，有時又變返人，搞到佢自己都亂晒籠，爆出無限笑料！
查實無端端好人好姐點會變狗，原來事件背後隱藏驚世大陰謀！「好狗先生」得番「半條人命」，點樣同財雄勢大無良大財團周旋？
詹瑞文好狗發聲
製作特輯
棟篤配音Show
至鍾意扮鬼扮馬嘅詹瑞文，今次主打聲演「好狗先生」不知幾咁興奮，睇片時已經笑到碌地，覺得個角色有大把笑位俾佢盡情發揮！到正式配音時，佢一時講人話，一時講狗話，仲有自創半人半狗話，得閒即興又唱番兩咀勁歌金曲，完全將「好狗先生」嘅爆笑抵死演繹得淋漓盡致！
配音現場雖然只係收音唔見樣，但詹瑞文肉緊起來七情上面，令在場工作人員笑聲不絕拍爛手掌，覺得好似免費欣賞了一場詹瑞文棟篤獨腳Show，真係賺晒！
度橋加料大贈送
個腦轉得快過人嘅詹瑞文，仲一路配音一路爆肚，猛咁加入自己獨門招牌笑料，令到呢套瘋狂喜劇更加地道，更加抵死啜核，更加「詹瑞文」！ 例如有場戲講個主角變成狗之後，在狗公園被其他狗猛咁索Pat Pat，詹瑞文忍唔住爆咗句：「喂！你班友仔咪再隊埋我個Pat 度，我雖然係狗，但絕對唔係一隻斷背狗！」又例如另一幕描述著住西裝嘅主角，四腳趴趴發癲咁通街追貓，詹瑞文就串咗句：「我實捉到你隻衰貓，我做開狗仔隊追慣車，方力申Stephy都俾我嚇到面青！」
「笑死狗」形體特技
配音之餘，為配合宣傳，詹瑞文仲毫無保留話影就影，拍攝了多款「好狗」造型照，充分發揮佢最犀利嘅形體特技，自度各種「好狗」甫士，綁狗帶咬狗骨接飛碟乜都做齊，令「好狗先生」狗上加狗，笑言林狗都唔係佢對手！
好狗製作特輯
真狗假狗玩過界
電影大玩人狗搞過界，咁搞鬼嘅題材當然要出動最先進嘅電腦特技，務求做到真嘅一樣，為觀眾帶來無限驚喜，睇得更加投入！為了令狗主角的表情更加神奇和豐富，工作人員精心訂造了一隻電子操控嘅假狗，第一步係以狗演員阿Coal為藍本，以攝錄機拍低佢一舉一動，甚至將佢原隻掃描，以求準確複製阿Coal嘅毛色、身形同埋表情。雛型完成之後，仲要重複進行嚴格測試，確保隻假狗嘅毛髮郁動時飄揚得夠自然。之後再在狗頭裡加入精細機械裝置，以便遙控佢眼仔碌碌鼻郁郁，表情一秒間由驚愕轉為嬲爆爆都得，總之就做到真狗一樣，但又有卡通化嘅趣怪神情，令影片更加爆笑和瘋狂！
CG特技驚險爆笑
至於處理人變狗、狗變人呢類奇幻場面，除了真狗假狗落力演出之外，仲要出動埋CG狗，當中最考功夫就係要將同場演出嘅真狗、假狗、CG狗，甚至一大班真假CG動物，在畫面上毫無破綻地合而為一。其中最精彩一幕特技場面，係大笨狗在洛杉磯鬧市中的半空橫衝直撞，再凌空降落一架高速行駛嘅飛車上，要成功攝製呢個高難度場面，工作人員先要分頭拍攝洛杉磯實景，同埋將大笨狗在綠色布幕前大吊威也，再經電腦準確計算，夾準兩部機嘅拍攝速度，繁繁複複做足一大輪功夫，大家先至可以在大銀幕上欣賞到咁驚險刺激又爆笑嘅動作場面！
片場變身動物園
電影中除了大笨狗主角之外，仲有唔少奇珍異獸助陣演出，幫手發放笑料，包括有馬騮仔、貓仔、兔仔、錦毛鼠、眼鏡蛇等。其中最唔講得笑係一條身長達12尺嘅毒蛇王，身上嘅毒液足以殺死50個大男人！
呢班動物嘅造型同演出都非常騎呢，既有蛇身接狗尾嘅大蛇王、識得吠嘅馬騮仔，仲有鍾意冥想同做瑜伽嘅兔仔，當然全靠電腦特技加工，總之千奇百怪包羅萬有，全部做到真嘅一樣，肯定會為觀眾帶來無限驚喜！
每日開工，片場同動物園冇乜分別，一大班動物加埋一大班訓練員，搞到導演頭都暈埋，但佢發現自己其實幾enjoy同班動物合作，原因係：「動物唔會駁咀嘛！」
棟篤笑王狗狗震
一個大男人，要烚熟狗頭伸晒脷、四腳趴趴通街走、抬高隻腳去廁所、「隊」個頭埋人地個pat度索索索……，如此講求喜劇感形體動作「狗到極」的高難度演出，當今世上孭到飛嘅數得出得幾位，幕後人員心水首選係著名棟篤笑王添艾倫 (Tim Allen)，但又擔心堂堂大明星要佢扮狗睬你都傻，好彩添艾倫原來係100%「狗男人」，由細養狗養到大，有機會親身扮演愛犬不知幾興奮，仲視為搞笑生涯最大挑戰！
接到個job後，添艾倫即刻捉住屋企隻狗，同埋𥄫實街上各式各類嘅狗猛咁研究，留意佢哋每個細微表情小動作，鑽研佢哋究竟諗緊乜，再努力模仿同埋實習每個狗動作，由舔人塊面、用狗兜開餐，到落手落腳又走又跳，全部跟到足，務求做到形神俱似笑死觀眾！
吊威也「狗」動作場面
電影中最爆笑一幕追貓場面，添艾倫一身西裝骨骨，卻要四腳趴趴在大街小巷橫衝直撞，仲要掟彎跳牆撲上車頂，添艾倫搏晒命跑到隻狗咁，不過人快極始終追唔上狗嘅速度，所以要出動吊威也特技幫幫手，搞到添艾倫損手爛腳傷痕累累，笑說非常羨慕狗仔有厚肉腳掌傍身，唔使咁傷身！
由於添艾倫的角色會突然人變狗、狗變人，動作誇張郁動幅度又大，服裝指導幫佢設計服裝真係頭都大晒，既要斯文look但布料又要有足夠彈性應付「狗動作」場面，每款造型起碼要預備十幾套相同衫褲，以便一爛即換，仲要在設計細節上表現人狗演變過程，認真考功夫！
大笨狗全場最搶鏡
電影中最重要的另一角色當然係果隻大笨狗。幕後人員左度右度，終於一致選定外形得意似足毛公仔、性格樂天開心、聰明醒目學習能力又高嘅「長鬍牧羊狗」 (Bearded Collie) 做主角。
幾經嚴選，6隻又靚又叻嘅大笨狗順利入圍，訓練班隨即開始上堂。課程要求極高，班狗要學用腳掌打電腦、學英文玩串字遊戲，仲要訓練在一架開動中的巴士頂踩滑板，真係人都未必做得到！去到片場，班狗更要苦練集中精神，唔好被人群雜聲分心，影響演出。雖然要求咁高，6隻狗當中有一隻叫阿Coal嘅特別標青，勝在夠主動、學得快、好合作，肯搏肯挨，脫穎而出成為狗明星！
呢套戲係阿Coal嘅首部電影作品，幕後人員開頭都好擔心佢能否應付份工，特別訂造一隻像真度極高、電子操控嘅假狗，作為替身演出一些高難度場面，點知阿Coal愈戰愈勇，有95%嘅場面都係親自上陣，完全交到戲，令導演喜出望外，大讚佢演技出色，直情係片場上最出色嘅演員！
好狗一班友
「好狗先生」戴偉德
工作狂律師，只顧向上爬，為咗成為檢察官，不擇手段。
唔得閒理老婆，同仔女關係疏離。
最唔鍾意狗，但偏偏變成一隻狗，仲要有時係人，有時係狗…
好狗男主角：添艾倫 (Tim Allen)
棟篤笑出身，憑大熱處境劇集《Home Improvement》，贏得金球獎和艾美獎提名，多年來一直被觀眾選為最受歡迎的喜劇明星。最為人熟悉的作品有《今個聖誕大件事》 (The Santa Clause)，以及為《反斗奇兵》(Toy Story) 的巴斯光年配音。
「好狗老婆」碧嘉
現代媽咪，家庭與事業都咁掂。
溫柔體貼，默默忍受老公的冷落。
好狗女主角：姬絲汀戴維斯 (Kristin Davis)
最為人熟悉是在《色慾都市》(Sex and the City) 飾演Charlotte一角，憑此劇獲金球獎和艾美獎提名。喜劇感和演技得到認同，隨即進軍影壇，片約不斷。
「好狗死對頭」哥沙教授
神經質、心狠手辣嘅科學家。
在藥廠從事神秘基因實驗
近日表現古怪，舉止行為愈來愈「狗」…
好狗男配角：羅拔唐尼 (Robert Downey Jr.)
影壇公認的演技派，憑《卓別靈傳》(Chaplin) 飾演一代笑匠差利，羸得英國金像獎最佳男主角，以及榮獲奧斯卡提名。其後客串大熱劇集《甜心俏佳人》(Ally McBeal)，贏得金球獎。近期作品為與佐治古尼 (George Clooney) 合作演出備受爭議的電影《各位觀眾晚安》(Good Night, and Good Luck)。
「好狗阿女」卡莉
聰明、獨立、反叛。
「拯救動物會」成員，積極為動物爭取權益，不惜與阿爸反面。
「好狗阿仔」亞祖
內向、懦弱，唔敢向爹哋表達意見。
學業成績差勁，數學英文科科都肥。
鍾意唱歌，最憎踢波，夢想參演音樂劇《油脂》
「好狗隻狗」毛毛
聰明、友善嘅長毛大笨狗。
鍾意玩電腦同串字遊戲，仲識得送花氹女仔！
身份成謎，傳說來自西藏，長生不老，有成300歲！
《好狗先生》
復活節4月13日 爆笑開SHOW！
註：以上資訊由片主或其推廣代表提供。本網並不保證此等資訊是否正確。
Note: The information above is provided by the owners of the film or their agents
who are responsible for the promotion of the film. We do not guarantee the accuracy
of such information.
相關連結 Related Links
|
Copyright(C)
1999-2011 Hong Kong Internet Ventures. All rights reserved.
|